صباح_مــصــري
بقلم : د سميرالمصري
فريق عمل بوابة المحروسة الاسكندرية
فلترة القلوب.. لما الخسارة تبقى أول المكسب!
الوشوش الملونة.. والباب المقفول
في حياتنا بنقابل ناس كتير، بس أصعبهم اللي بيمثلوا الحب وهما شايلين في قلوبهم عكس كدة.
صدقني، اللي بيبينلك عداوته بصراحة وبشرف، أرحم بكتير من اللي بيضحك في وشك وهو بيدور على أي فرصة عشان يكسر مقاديفك.
عشان كده، الباب اللي يجيلك منه ريح الوجع والتعب، سده واستريح.. حتى لو كان اللي بيخبط عليه حد كان غالي في يوم من الأيام.
سلامتك النفسية وصحتك مش بضاعة رخيصة عشان تفتح بابك للي يوجعها.
في خسارة بتصحينا ، ساعات بنزعل أوي لما بنخسر علاقة أو بنفقد شخص كنا فاكرينه السند . بس لو بصيت بقلب راضي وعقل واعي، هتكتشف إن “الخسارة” دي في الحقيقة هي أكبر مكسب! هي الثمن اللي دفعته عشان تشتري بيه وعي وفهم جديد للحياة وللناس.
الخسارة دي فكّت الغمامة اللي كانت على عينك، وعرّفتك مين يستاهل يكمل معاك ومين كان مجرد “درس” وهيعدي.
يعني م الاخر وفر كلامك.. ووفر ردودك ، مش كل حد يتكلم يستاهل تضيع وقتك وترد عليه، ومش كل ودن بتسمعك بتفهمك. وفر طاقتك الذهنية والنفسية؛ الرد خليه بس للي يقدر قيمته ويستحقه، والكلام الراقي والفضفضة خليهم للقلوب والعقول اللي بتفهمك من نظرة عين، مش اللي بتدور وراك على غلطة في كل كلمة بتقولها.
طنش تعش تنتعش!
هنا السؤال طيب هنعمل ده إزاي في يومنا؟
فعّل قانون “ترباس الباب” لو فيه علاقة قديمة أو شخص جربت معاه مراراً وتكراراً ودايماً بيصدرلك طاقة سلبية أو أذى، خد قرار حاسم واقفل الباب ده تماماً من غير تأنيب ضمير.
استخدم نظارة الوعي، لما تفتكر أي تجربة مؤلمة أو خسارة قديمة، بلاش تبكي على اللبن المسكوب. اسأل نفسك “أنا اتعلمت إيه من ده؟” وخلي الدرس ده هو كنزك الجديد.
اشتغل علي فلترة الردود وطبق قاعدة الـ 5 ثواني قبل ما تندمج في جدال عقيم مع شخص مش هيفهمك، اسأل نفسك “هل الشخص ده يستاهل طاقتي؟” لو الإجابة لا، ابتسم بذكاء وانسحب بأدب.
#الخـــــلاصـــــة :
العمر قصير أوي عشان نضيعه في محايلة ناس مابتحبناش، أو في شرح نفسنا لناس مش عايزة تفهمنا.
قفل البيبان المؤذية مش قسوة.. ده منتهى الحب لنفسك!
بقلم د. سمير المصري
🖋️ ———————–دسميرالمــصــري
